創意雞蛋仔有驚喜!

經典港式小食雞蛋仔,我由細食到大,以為那些芋蓉味、朱古力味已經夠新奇,誰知近日在網上見旺角有間雞蛋仔專門店玩埋七彩雞蛋仔,當然要去試下。
小店雖然主打外賣,不過店內設有高身吧檯,見唔少客人買完都會立食雞蛋仔,店主會將雞蛋仔用碟上,再俾埋刀叉,幾過癮。本身諗住試七彩雞蛋仔,不過店主話暫時無賣了,因為有客人擔心色素問題,她就推介我地試Mango with me,話呢期呂宋芒果好靚好甜,哇,成品成碟甜品咁,雞蛋仔是原味,外脆內軟,幾有蛋香,上面鋪滿新鮮芒果肉,仲有芒果雪糕、自家打忌廉及朱古力醬,又香又滑,啖啖果香,正呀!不過芒果水份較多,雞蛋仔好易變腍,一影完相就要即食。

見另外有兩款鹹味雞蛋仔,也叫來share試試。Bolognese with me,貼心地可揀豬肉或牛肉,店主話牛肉會更香,咁就要牛肉啦。肉醬裡頭有蘑菇、番茄粒、洋蔥等,味道甜甜地,最正係仲有隻太陽蛋,將蛋黃汁拌勻吃更香滑,咬啖雞蛋仔,估唔到裡面竟然有粟米粒,雞蛋仔口感比一般綿密紮實無甜味,有點像豬仔包,整個配搭飽肚又好吃。另一款Curry with me,蛋漿加了咖喱粉來做,食落真係有淡淡咖喱味,好特別,上面是即煎的雞扒,雞皮微脆,肉質幾juicy,淋上自製咖喱汁,香濃而不辣,空口食有點鹹,不過夾埋雞蛋仔就剛剛好。

後來過幾日再試了花生醬雞蛋仔,每一粒雞蛋仔裡面都有香口的花生粒及花生醬,超好味,可另外加$5加煉奶,變成奶醬雞蛋仔,大力推介!不過記得要快食,唔係就腍晒。