情迷海鮮夜

銅鑼灣食街一帶的餐廳不時都大執位,最新登場就有這間Coast Seafood & Grill,一聽個名就知主打海鮮,海鮮控的我當然要率先試!
餐廳環境以航海為主題,用上船槳、纜繩等裝飾,加上一室木製家具,又有室外露天座位,氣氛很 causal,不過不知道是不是因為是開放式出入口,加上天氣熱,不時有小蚊滋飛來,有點打擾用餐的氣氛。

天氣咁悶熱,梗係要先來一盤 seafood platter,選了最豪華的 「Celebration」,$1,480有成10款海鮮,包括波士頓龍蝦、鱈場蟹腳、深海小龍蝦、西班牙深海紅蝦、美國馬尼拉蜆、海螺、帶子刺身,仲有一般西餐廳少見的北海道油甘魚刺身及海膽刺身,生蠔有8隻,品種視乎哪款當造,這次就有澳洲Coffin Bay及法國Gillardeau,新鮮爽甜,龍蝦有成一磅重,用海鮮湯烚熟,零舍鮮甜。雖然價錢較貴,但用料新鮮,且份量十足,兩個人share唔食其他菜式都好飽。

除了冰鎮海鮮,餐牌上還有多款熱食海鮮菜,店員推介的蘑菇芝士焗生蠔,賣相望落好一般,不過食味幾有驚喜,Portobello大啡菇釀有菠菜、薯仔,上面放上美國桶蠔連芝士白汁來焗,啡菇同桶蠔都爆晒汁,又有芝士的香滑及薯仔的咬口,很惹味。

接著要了酥炸蠔漢堡配他他醬及三文魚、鱸魚、紅鯡魚批,前者有成兩大隻炸蠔,味道普普通通,不過一定要趁熱吃,放耐少少個炸漿已經變腍,魚批也是麻麻地,批皮偏硬,魚肉又煮得老嚡,失望!

見menu上有我最愛的海鮮意大利麵,再飽也要柯打,幸好水準不錯,意大利麵條索晒海鮮湯的鮮香及車厘茄香,超惹味,海鮮料也算多,有大蝦、青口、蜆及魷魚,滿足得很。