重拾兒時冰室風味

自幾年前喜喜冰室開業,香港就掀起一陣懷舊風,很多餐廳都以舊式冰室的裝潢及食物作賣點,不過質素參差,有形無神。尖沙咀最近又新開一間懷舊冰室,單睇門面幾有80年代屋村冰室的氛圍,老式階磚地襯黑白馬賽克牆身,水吧頂好似以前咁有個懷舊的時鐘,最正是矮身的卡座椅背,即刻諗起以前街坊將手臂擱在椅背上,邊食邊打牙骹的景象。

裝潢對味,也要看看食物水準如何。食物有新有舊,見到炸雞髀、沙嗲牛肉包這些兒時最愛已急不及待一試。炸雞髀是真正生炸,即叫即做,size唔算大隻,不過雞皮真的很脆口,一落刀已聽到咔咔聲,肉質嫩滑又多汁,最重要是醃得入味而不過鹹,不會吃到雪藏味,配搭傳統冰室必備的粗身薯條,是最佳的下午茶combo。

沙嗲牛肉包是老闆大力推介的,據講沙嗲汁配方是跟一間已結業的老冰室請教得來的,個包一上檯,哇,估不到牛肉竟然大大片的鋪滿整個包,一點也不吝嗇,牛肉吃得出是新鮮貨,好香軟,但不是那種被鬆肉粉醃到無晒咬口那種,最靈魂的沙嗲汁果然跟細個吃到的一樣,花生味夠香,微辣,再慢慢滲出一陣甜香,好惹味!

還未夠喉,再來一件西多士,有成2吋厚,炸成金黃色,食落有蛋香,鬆軟亦不會成口油,最正是中間塗滿粗粒花生醬,加上鮮牛油及糖漿,是最邪惡的美食。紅豆冰也好足料,紅豆比例佔了近三分二,而且用大大粒台灣紅豆,煲得夠腍同時不失咬口,只略嫌稍甜了一些,也試了老闆自創的粟米芝士撈薯仔麵,用瑞士藍芝士加忌廉煮成汁撈韓國薯仔麵,還有溫泉蛋,我見fb好多客都大讚,味道是幾香,不過吃多幾口真的有點膩。